Эх, шеремет, У Ий пайремет!

Йӱштӧ теле йӱксын гай ош мамык шулдырешыже мемнан деке уэш У ийым конда. Юзо шӱлышан тиде пайремым мемнан кокла гыч кажныже ий еда шӱм вургыж вучена. Вучена ончыкыжо поро лийшашлан, шонен пыштыме сомылна ышташ йӧн лекшашлан, шонен коштмо еҥ дене вашлийшашлан ӱшанен.
Пайрем кумылеш чондам вӱдылаш вашкат Шкетан театрын артистше-влак. Эн сылне муро, чолга да весела куштымаш, чон канен воштылаш таратыше мыскара — чылажат У ий пайрем концерт программыште лыҥак лиеш теният. Воштончышан фойеш шогалтыме тӱрлӧ тӱсан тул дене йӱлышӧ кож йыр Йӱштӧ кугыза да Лумӱдыр дене пырля кушталтен, тиде кастене ончаш толшо кажне еҥ чонжо куанле шижмаш дене пойдаралтеш.
Эх, шеремет, Шкетан театрысе У ий пайремет!